ДАНОЧНАТА УПРАВА ЌЕ ЈА ЗАВРШИ 2009 СО 98 % СОБРАНИ ДАНОЦИ

Потфрли данокот на добивка

Управата за јавни приходи очекува до крајот на годинава да реализира 98 отсто од даночните приходи за 2009, кои со вториот ребаланс на Буџетот беа симнати на 73,4 милијарди денари. До вчера беа собрани 61 милијарда денари. Најслабо е собирањето на данокот на добивка, кој е реализиран со 84,8 отсто од 5,1 милијарда денари колку што се планирани со Буџетот.
"Овој данок се пресметува врз основа на финансисиските ефекти од претходната година а и во пакетот антикризни мерки имаше најголеми олеснувања токму кај зафаќањето од овој данок", ги објасни вчера причините за потфрлувањето кај оданочувањето на добивката директорот на УЈП Горан Трајковски.
Наплата на акциза, и покрај тоа што 2009 беше кризна година, е зголемена за 3 проценти споредено со претходната година. Лани биле собрани 13,3 милијарди денари а во 2009 - 13,6 милијарди.
"Бидејќи од 2010 година акцизите ќе ги наплатува Царинската управа, ќе им пренесеме 'златно јајце'", рече директорот Трајковски. (А.С.)