ОТКАКО ГИ ДЕКЛАСИРАА МАКЕДОНСКИТЕ ФУДБАЛЕРКИ СО 7:0

Холанѓанките ја покажаа и хуманата страна

Женската фудбалска репрезентација на Холандија не само што им одржи лекција на македонските колешки во Куманово, туку не пропушти ниту да ја покаже хуманата страна. "Лалињата" заедно со холандската амбасадорка Симоне Филипини истовремено донираа по 100 денари преку своите мобилни телефони за акцијата на амбасадата и на националната фондација за трансплатација за изградба на оделение за интезивна нега на клиниката за детска хирургија. Амбасадорката Филипини ги покани репрезентативките на вечера по убедливиот триумф над нашите девојки во квалификациите за СП 2011 во Германија од 7:0.
- Мислам дека оваа акција ќе успее. Инаку уживавме во натпреварот иако беше неизвесен. Мора да се каже дека женскиот фудбал во Македонија се уште не е ценет. Тоа можеше да се види од слабата посетеност како и од чудните реакции на дел од присутните. Убаво е за девојките да се занимаваат со спорт, пред се со фудбал, а за да имате подобри резултати, тоа мора да се прави поинтезивно и професионално - додаде Филипини.
Холандија без сомневање е една од велесилите во светскиот женски фудбал. Затоа и не чуди исходот од средбата во Куманово како и прва позиција во групата 2 со 13 бода, додека ние сме на дното со нула. Гостинските фудбалерки се задоволни од приемот а некои од нив сепак гледаат надеж за подем на женскиот фудбал кај нас.
- Уште во првото полувреме дадовме шест гола, по што Македонија се повлече. Се играше брзо и забележав дека имате неколку квалитетни играчи но сепак ве очекува уште многу работа - кажа капитенот на Холандија, Ману Мојлен. (Н.П.)