ТОП 5 ДЕРБИ-СРЕДБИ

Она што за Лондон е Арсенал-Тотенхем, тоа е Милан-Интер за Милано. Шпанија го има "Ел Класико" Реал Мадрид-Барселона, а Аргентина "Суперкласико" Бока-Ривер. Во Грција, секој дуел на Панатинаикос и Олимпијакос е меч од висок ризик, исто како кога во Србија играат Партизан и Црвена звезда. Овие натпревари се повеќе од обични, тие се "вечни", за нив се живее, но имало случаи и за нив да се гине. "Вест" ги избра петте најголеми дерби-средби во поновата историја на македонскиот спорт.

1. Работнички-МЗТ Скопје

Без разлика дали се борат за титулата или се оддалечени неколку позиции на табелата, за двете скопски екипи, а особено за нивните фанатични навивачи, овие натпревари се свети, прашање на чест и престиж и победата секогаш е императив. "Вечните" секогаш се следени од жестока борба, досетливи скандирања и транспаренти, предмети на паркетот, зачадени трибини, инциденти што "мирисаат" во воздухот... Преминувањето од еден во друг клуб е непростливо.

2. Вардар-Пелистер

Ривалството помеѓу Скопје и Битола никогаш не стивнало, ама значењето на поимот дерби тука им е познато само на позрелите навивачи на овие два клуба. Дуелите на Вардар и Пелистер, како во фудбалот, така и во ракометот, одамна ги немаат некогашните жар и квалитет, одамна не будат интерес кај јавноста, но корените на терминот дерби во македонскиот спорт лежат токму тука.

3. Вардар-Металург

Со години само градски ривали чии меѓусебни дуели немаа никакво влијание врз исходот на првенството, овие пресметки, според многумина, денес се најголемото ракометно дерби на бившите ју-простори. Наелектризирани, провокативни, драматични, со тек на време тие се претворија во личен натпревар на двајцата најголеми спонзори на македонскиот ракомет Михајло Михајловски и Минчо Јорданов, кои се тркаат кој ќе донесе попознато тренерско или играчко име.

4. Бучим-Балканец

Борењето е еден од носечките и најтрофејни спортови во нашата земја, а Радовиш и Штип се два од неговите најразвиени центра и ривалството помеѓу нивните клубови Бучим и Балканец непрекинато трае веќе 20-ина години. За тој период се изменуваа како прваци, а штипјани отидоа и голем чекор подалеку, освојувајќи ги Купот на европските шампиони и Интерконтиненталниот куп. Неретко во нивните дуели се излегува(ше) и од границите на борењето.

5. Пелагониско дерби

Ова регионално дерби на битолски и прилепски екипи, можеби, ја нема вообичаената тензија и играчите често мигрираат кај соседот, но, на локално ниво, привлекува голем интерес. Она што го почнаа Пелистер и Победа во фудбалот, едно време соодветно го следеа Пелистер и Тутунски комбинат во ракометот, но денес се се сведува на одржување на една убава спортска традиција.